أحمد الشيخ علي
(شعر بالمحكيّة العراقية)
.
عيونك يا قناديل بحياتي – الليل
يا چم ليل بعيونك
يَصُبْح اخضر يلوذ ابكِتر شبّاچي
و يظل يحچي سواليفه الأليفه لكل گلب باچي
متسودن عليّه الليل
بعيونك..
و اهو مو ليل،
لا چلمه،
ولا نغمه
و اهو مو لون وترسمه
و اهو مو كلشي..
بس كلشي!
اهو اليوم
واهو باچر
واهو كل يوم مر بحلم لو خاطر…
ولك كافي
يَزهر البرتقال المستحي وغافي
على اشفافي
يظل اسمك عطش
يالمنتشي وريّان
مو كافي…
تعديت الشعر وتمردت لاوزان
ولك يا ليل
صبح وليل
يا ليل وصبح مخلوق منها انسان
اريد اتوسد احلامك
چذب.. ما اريد…
اريد اتوسدك واحلم
وافز من الحلم
واتوسدك واحلم
واريد احلم بعد منك
واريد وياك
واحلملك
واشوفك بالحلم شتشوف
واحلم بيك تحلم بيه فد ليله
حلم ما ينحچي..
لاتگول،
خاف الحلم كله يزول
خله يفز حلمنه من الحلم بهداي
وخلينه أنا ويّاك
محلومين،
بعيون الحلم نتوسد آنه وياك.
(آنه وياك).
مجلة كناية الرقمية الثقافية المستقلة 
أضف تعليق